សៀវភៅដែលខ្ញុំបានអានចប់ក្នុងខែកក្កដានិងខែសីហា ឆ្នាំ ២០២៦

 ថ្ងៃនេះជាថ្ងៃដំបូងនៃខែកញ្ញា ហើយក៏ជាថ្ងៃដែលខ្ញុំចាប់ផ្ដើមអនុវត្តការងារតាមកាលវិភាគឡើងវិញដែរ ។ ខ្ញុំខកខានមិនបានអនុវត្តការងារតាមកាលវិភាគអស់ពេលជ...

 ថ្ងៃនេះជាថ្ងៃដំបូងនៃខែកញ្ញា ហើយក៏ជាថ្ងៃដែលខ្ញុំចាប់ផ្ដើមអនុវត្តការងារតាមកាលវិភាគឡើងវិញដែរ ។ ខ្ញុំខកខានមិនបានអនុវត្តការងារតាមកាលវិភាគអស់ពេលជាច្រើនខែមកហើយ ។ នៅចុងខែសីហា ខ្ញុំបានកែសម្រួលកាលវិភាគប្រចាំថ្ងៃឡើងវិញ សម្រាប់ចាប់ផ្ដើមអនុវត្តបន្តចាប់ពីខែនេះតទៅ ។

ព្រឹកនេះ ខ្ញុំឆ្លៀតពេលបន្តិច ដើម្បីសរសេររៀបរាប់ពីសៀវភៅដែលខ្ញុំបានអាន ។ ខ្ញុំនឹងរៀបរាប់ពីសៀវភៅដែលខ្ញុំបានអានចប់ក្នុងខែកក្កដានិងខែសីហា ដាក់រួមបញ្ចូលគ្នាតែម្ដង ។ ខែមុន ខ្ញុំមិនបានសរសេររៀបរាប់ពីសៀវភៅដែលខ្ញុំបានអានចប់ក្នុងខែកក្កដានោះទេ ។ ខ្ញុំគិតថា ខ្ញុំអានសៀវភៅបានតិចតួចក្នុងខែនោះ ហើយខ្ញុំក៏មិនសូវមានអារម្មណ៍ល្អផង ខ្ញុំក៏សម្រេចចិត្តចាំសរសេររួមគ្នាជាមួយខែសីហាតែម្ដងទៅ ។ សៀវភៅដែលខ្ញុំបានអានចប់ក្នុងខែកក្កដាមានចំនួនបីក្បាល ហើយសៀវភៅដែលខ្ញុំបានអានចប់ក្នុងខែសីហាក៏មានចំនួនបីក្បាលដែរ ។ ក្នុងខែកក្កដា ខ្ញុំចំណាយពេលតិចតួចណាស់ដើម្បីអានសៀវភៅ ។ លុះដល់ខែសីហា ខ្ញុំក៏នៅតែមិនសូវបានអានសៀវភៅជាប់លាប់ដដែល ។ នៅពាក់កណ្ដាលខែសីហា ខ្ញុំបានរៀបចំកែសម្រួលការងារមួយចំនួន ហើយក៏ឃើញថា ការងារអានសៀវភៅនាពេលចុងក្រោយនេះ ខ្ញុំពុំសូវបានអនុវត្តឲ្យបានពេញដៃពេញជើងសោះ; ហេតុនេះ ខ្ញុំក៏ជំរុញការងារនោះឡើងវិញជាបន្ទាន់ ។ ចាប់តាំងពីពាក់កណ្ដាលខែសីហាមក ខ្ញុំខិតខំឆ្លៀតពេលអានសៀវភៅឡើងវិញ; ទោះមិនសូវបានទៀងទាត់ដូចដើម ក៏ខ្ញុំបានព្យាយាមពង្រឹងការងារនេះឡើងវិញជាបណ្ដើរៗហើយ ។ តាមពិត មួយរយៈចុងក្រោយនេះ ខ្ញុំរវល់ជាប់ជាមួយការងាររុះរើនិងរៀបចំប្រព័ន្ធអនុវត្តការងារប្រចាំថ្ងៃ និងរវល់ដោះស្រាយបញ្ហាផ្ទាល់ខ្លួនមួយចំនួនទៀតផង; អ៊ីចឹងហើយទើបខ្ញុំពុំសូវមានពេលធ្វើការងារផ្សេងៗ ជាពិសេសគឺការងារអានសៀវភៅនេះតែម្ដង ។

សៀវភៅដែលខ្ញុំបានអានចប់ក្នុងខែកក្កដា ឆ្នាំ ២០២៦ ៖

• សៀវភៅ «Self-discipline in 10 days» Theodore Bryant
• សៀវភៅ «ប្រវត្តិរបស់ អាដុលហ៊ីត្លែរ»
• សៀវភៅ «ជំនួយសតិ ភាគ៨» ប៊ុត សាវង្ស

សៀវភៅដែលខ្ញុំបានអានចប់ក្នុងខែសីហា ឆ្នាំ ២០២៦ ៖

• សៀវភៅ «The Things You Can See Only When You Slow Down: How to Be Calm in a Busy World» Haemin Sunim [4-star book]
• សៀវភៅ «ជំនួយសតិ ភាគ៩» ប៊ុត សាវង្ស
• សៀវភៅ «បារមីភាគ២» ប៊ុត សាវង្ស

ខ្ញុំនឹងបន្តរៀបរាប់បន្តិចទៀត ដោយត្រួសៗពីសៀវភៅដែលខ្ញុំបានអាននេះ ។ សៀវភៅ «Self-discipline in 10 days» របស់ Theodore Bryant, ជាសៀវភៅដែលខ្ញុំចាប់ផ្ដើមអានតាំងពីដើមខែមិថុនា ក្នុងពេលដែលខ្ញុំមានបំណងចង់ពង្រឹងវិន័យផ្ទាល់ខ្លួនឡើងវិញ ។ ដំបូង ខ្ញុំចង់អានសៀវភៅ «The 5 Second Rule» របស់ Mel Robbins ទេ តែក៏គិតថា សាកអានសៀវភៅ «Self-discipline in 10 days» នេះសិន មុននឹងអានសៀវភៅរបស់ Mel Robbins ។ សៀវភៅ «ប្រវត្តិរបស់ អាដុលហ៊ីត្លែរ» ជាប្រភេទសៀវភៅបែបជីវប្រវត្តិខ្លីៗ ចេញផ្សាយដោយ IDEA BOOK ដែលត្រូវបានរៀបរៀងឡើងជាពីរភាសា គឺ ភាសាខ្មែរនិងភាសាអង់គ្លេស ។ ខ្ញុំក៏ធ្លាប់បានអានសៀវភៅប្រភេទនេះពីមុនមកដែរ ។ លើកនេះ មិត្តរួមការងាររបស់ខ្ញុំបាននាំយកសៀវភៅយកមកឲ្យខ្ញុំអានជាច្រើនក្បាល រួមទាំងសៀវភៅប្រភេទនេះបី-បួនក្បាលដែរ ។ ក្រោយពីអានសៀវភៅនេះចប់ ខ្ញុំក៏សម្រេចចិត្តថា ខ្ញុំនឹងបន្តអានសៀវភៅក្នុងប្រភេទនេះដែលនៅសល់នោះទៀតទេ ។ ក្នុងខែកក្កដា ខ្ញុំបន្តអានសៀវភៅជំនួយសតិរបស់លោកគ្រូអគ្គបណ្ឌិត ប៊ុត សាវង្ស បានតែមួយក្បាលទេ ។ សៀវភៅ «ជំនួយសតិ ភាគ៨» នេះ ជាមេរៀនធម៌គម្ពីរបុគ្គលបញ្ញត្តិ តែលោកគ្រូអគ្គបណ្ឌិតរៀបរៀងមកក្នុងសៀវភៅនេះតែបុគ្គលពួក ១ ប៉ុណ្ណោះ (នៅមានបុគ្គលពួក ២ និងពួក ៣ ទៀត ពុំបាននាំមកដាក់បញ្ចូលក្នុងសៀវភៅនេះទេ) ។ សរុបមក ខ្ញុំអានសៀវភៅបានតិចតួចណាស់ក្នុងខែកក្កដា ។ លុះដល់ខែសីហា ខ្ញុំក៏នៅតែមិនសូវបានអានសៀវភៅដូចក្នុងខែកក្កដាអ៊ីចឹងដែរ ។ ដូចដែលខ្ញុំបានរៀបរាប់ខាងដើមខ្លះមកហើយ គឺ ទើបតែដល់ពាក់ខែសីហាទេ ទើបខ្ញុំខិតខំឆ្លៀតពេលអានសៀវភៅឡើងវិញ ។ ក្នុងខែសីហានេះ ខ្ញុំរវល់ដោះស្រាយបញ្ហាផ្ទាល់ខ្លួនមួយចំនួន ហើយក៏មានអារម្មណ៍មិនសូវល្អផង; ខ្ញុំក៏នឹកឃើញដល់សៀវភៅដែលមិត្តរួមការងារចាស់របស់ខ្ញុំធ្លាប់ណែនាំឲ្យអានកាលពីឆ្នាំ ២០១៩ ។ កាលនោះមិត្តរួមការងារខ្ញុំបានណែនាំឲ្យខ្ញុំអានសៀវភៅមួយក្បាលរបស់ Haemin Sunim (Zen Buddhist teacher) ។ ខ្ញុំក៏ត្រលប់ទៅរកមើលសៀវភៅរបស់ Haemin Sunim ឡើងវិញ ហើយរកឃើញសៀវភៅបីក្បាលគឺ សៀវភៅ «Love for Imperfect Things: How to Accept Yourself in a World Striving for Perfection», សៀវភៅ «The Things You Can See Only When You Slow Down: How to Be Calm in a Busy World», និងសៀវភៅ «When Things Don't Go Your Way: Zen Wisdom for Difficult Times» ។ ខ្ញុំក៏សម្រេចចិត្តអានសៀវភៅ «The Things You Can See Only When You Slow Down: How to Be Calm in a Busy World» នាពេលនោះតែម្ដងទៅ ។ ខ្ញុំបានអានសៀវភៅនេះចប់ ហើយកំពុងបន្តអានសៀវភៅ «Love for Imperfect Things: How to Accept Yourself in a World Striving for Perfection» ជាបន្តទៀត ។ ក្នុងខែសីហា ខ្ញុំបន្តអានសៀវភៅជំនួយសតិបានមួយក្បាលទៀត គឺ សៀវភៅ «ជំនួយសតិ ភាគ៩» ។ សៀវភៅ «ជំនួយសតិ ភាគ៩» នេះ លោកគ្រូអគ្គបណ្ឌិតប្រមូលរួបរួមធម៌អាថ៌អំពី «យោនិសោមនសិការ» ដែលក្នុងនោះមានរៀបរាប់អំពីវិធីគិតដែលជាយោនិសោមនសិការ ប្រមូលជាបែបជាក្រុម សរុបមានចំនួន ១០ ។ ពេលអានសៀវភៅ «ជំនួយសតិ ភាគ៩» ចប់, ខ្ញុំក៏នឹកឃើញដល់សៀវភៅ «បារមី» ដែលជាសៀវភៅរៀបរៀងដោយលោកគ្រូអគ្គបណ្ឌិតដែរនោះ ហើយខ្ញុំនៅមិនទាន់បានអានចប់គ្រប់ភាគ ខ្ញុំក៏បន្តអានសៀវភៅ «បារមីភាគ២» ទៀត ។ សៀវភៅ «បារមីភាគ១» ខ្ញុំបានអានចប់កាលពីខែមិថុនា ហើយសៀវភៅនេះ ខ្ញុំទទួលពីមិត្តខ្ញុំ (មានតែមួយភាគ), ឯសៀវភៅ «បារមីភាគ២» ខ្ញុំទាញយកពីគេហទំព័រ ៥០០០ ឆ្នាំ ។

ខ្ញុំរៀបរាប់ប៉ុណ្ណឹងទៅចុះ ។ ខ្ញុំចាប់ផ្ដើមសរសេរអត្ថបទនេះតាំងពីពេលព្រឹក ហើយក៏រវល់ជាមួយកិច្ចការផ្សេងៗ កិច្ចការនេះបន្តិចកិច្ចការនោះបន្តិច; ខ្ញុំទើបតែបន្តសរសេរបញ្ចប់អត្ថបទនេះក្រោយពីទទួលទានអាហាររួច ។ ខ្ញុំដូចជាមិនមានអ្វីដែលត្រូវរៀបរាប់បន្ថែមទៀតទេ ។ ខ្ញុំសង្ឃឹមថា ការត្រលប់មកអនុវត្តការងារប្រចាំថ្ងៃតាមកាលវិភាគឡើងវិញនេះ នឹងប្រព្រឹត្តទៅដោយភាពល្អប្រសើរ ហើយខ្ញុំក៏សង្ឃឹមថា ខ្ញុំនឹងបន្តអានសៀវភៅឲ្យបានច្រើនឡើងវិញ សម្រចឲ្យបាននូវគោលដៅអានសៀវភៅប្រចាំឆ្នាំដែលខ្ញុំបានកំណត់ ។

រាជធានីភ្នំពេញ ១ កញ្ញា ២០២៦ វេលាម៉ោង ១១:៥៧ នាទីព្រឹក