សៀវភៅ សីលត្ថទីបនី

ខ្ញុំចាប់ផ្ដើមអានសៀវភៅនេះតាំងពីថ្ងៃទី ២៥ ខែមិថុនា ហើយទើបបានអានចប់នៅថ្ងៃទី ៣០ ខែសីហា កន្លងទៅថ្មី ៗ នេះ (ខ្ញុំចំណាយពេលអស់ដប់ប្រាំម៉ោង ហាសិបនាទ...

ខ្ញុំចាប់ផ្ដើមអានសៀវភៅនេះតាំងពីថ្ងៃទី ២៥ ខែមិថុនា ហើយទើបបានអានចប់នៅថ្ងៃទី ៣០ ខែសីហា កន្លងទៅថ្មី ៗ នេះ (ខ្ញុំចំណាយពេលអស់ដប់ប្រាំម៉ោង ហាសិបនាទី ដើម្បីអានសៀវភៅនេះ) ។ ខ្ញុំយកសៀវភៅនេះមកអានដោយសារលោកម្ចាស់គ្រូ សន ទស្សនវិទូ ព្រះអង្គយកសៀវភៅនេះមកបង្រៀនតាមរយៈ Group Telegram ។ ខ្ញុំមានសេចក្ដីជ្រះថ្លាចង់សិក្សាអំពីសីលជាយូរមកហើយ រួចក៏បានទទួលព័ត៌មានអំពីការសិក្សានេះតាមរយៈបណ្ដាញសង្គម ។ ដោយគិតថា បើបានជារៀនព្រះវិន័យពីសៀវភៅនេះហើយ ខ្ញុំគួរយកសៀវភៅនេះមកអានដែរកុំឲ្យខាតចោលទទេនោះ ។ សម្រាប់ថ្នាក់រៀន សិក្សាក្នុងព្រះវិន័យអំពីសីលរបស់គ្រហស្ថ (៨:០០ - ៩:០០) នេះ ខ្ញុំមិនបានចូលរៀនផ្ទាល់តាមម៉ោងពេលកំណត់នោះទេ; ខ្ញុំបានត្រឹមឆ្លៀតពេលស្ដាប់សំឡេងបង្រៀនដែលបានថតទុកប៉ុណ្ណោះ ។ បើត្រូវស្ដាប់ត្រង់ចំណុចណា ខ្ញុំឆ្លៀតពេលអានសៀវភៅត្រង់ចំណុចនោះជាមុនសិន ទើបស្ដាប់សំឡេងបង្រៀនជាក្រោយ ។ ពេលអានសៀវភៅនេះហើយបានស្ដាប់សំឡេងបង្រៀនជាខាងក្រោយទៀត ទើបខ្ញុំយល់ថា ការអានសៀវភៅក្នុងព្រះពុទ្ធសាសនានេះទាល់តែមានលោកអ្នកចេះដឹងដែលជាពហុស្សូតជួយអធិប្បាយពន្យល់បន្ថែមទៀតទើបអាចយល់សេចក្ដីបានច្រើន ។ ក្រោយពីបានអាននិងសិក្សាអំពីសីលរយៈពេលប្រមាណជាងពីរខែនេះរួចមក ខ្ញុំបានយល់ដឹងអំពីសីលនេះច្រើន ដែលល្មមអាចយកមកបដិបត្តិឲ្យបានកាន់តែល្អនិងត្រឹមត្រូវឡើង ។

តាមរយៈការស្ដាប់សំឡេងនៃការបង្រៀននេះ ខ្ញុំមានសេចក្ដីយល់ចូលចិត្ត និងមានសេចក្ដីដឹងគុណដ៏ក្រៃលែងចំពោះលោកម្ចាស់គ្រូ សន ទស្សនវិទូ ដែលព្រះង្គមានព្រះទ័យអនុគ្រោះ ឆ្លៀតពេលវេលាបង្រៀនពុទ្ធបរិស័ទឲ្យបានយល់ដឹងអំពីធម៌អាថ៌វិន័យនេះ ។ ខ្ញុំនឹកស្រណោះព្រះថេរដីការបស់លោកម្ចាស់គ្រូ នៅពេលដែលព្រះអង្គបានដឹងពីកិច្ចបដិបត្តិរបស់បរិស័ទ; ព្រះអង្គមានព្រះថេរដីកាថា អាត្មាមិនសូវដែលបានដឹងពីសុខទុក្ខរបស់ញាតិញោម… (ស្មានតែញាតិញោម ចេះដឹងអំពីសីលបានច្រើនហើយ មិនបានដឹងអីថាញាតិញោម មិនទាន់ចេះដឹងក្នុងសីលវិន័យដូច្នេះសោះ) ។ ព្រះអង្គតែងមានព្រះទ័យករុណា អនុគ្រោះដល់បរិស័ទឲ្យបានយល់អំពីធម៌វិន័យ ទោះព្រះអង្គកំពុងមានអាពាធក៏ព្រះអង្គនៅតែខិតខំបង្រៀនបរិស័ទដែរ ។

បន្តពីនេះទៅ ខ្ញុំនឹងអានសៀវភៅបន្តបន្ទាប់ទៀតដែលលោកម្ចាស់គ្រូបង្រៀន ។ មកដល់ពេលនេះ នៅមានសៀវភៅពីរក្បាលទៀតដែលខ្ញុំត្រូវអានបន្ត ។ សៀវភៅទី ១ គឺ សៀវភៅ «អភិធម្មត្ថសង្គហៈ បរិច្ឆេទទី ១» រៀបរៀងដោយ ភិក្ខុ អគ្គធីរោ គង់ សុមិត្ត ដែលលោកម្ចាស់គ្រូទើបបានបង្រៀនចប់ថ្មី ៗ នេះ (នឹង​បន្ត​ដល់​ចប់​គ្រប់ ៩ បរិច្ឆេទ), និងសៀវភៅទី ២ គឺ សៀវភៅ «បាលីវេយ្យាករណ៍ សម្រាប់សិស្សសាលាពុទ្ធកបឋមសិក្សា ថ្នាក់ដំបូង» រៀបរៀងដោយ ព្រះពុទ្ធវង្ស សេខ នាង ដែលលោកម្ចាស់គ្រូបានចាប់ផ្ដើមបង្រៀនបន្តនាពេលថ្មី ៗ នេះដែរ ។ បើមានការបង្រៀនផ្សេង ៗ ទៀត ខ្ញុំនឹងបន្តអាននិងរៀនជាបន្តបន្ទាប់ទៀត ។

បើពុទ្ធបរិស័ទ​ចង់សិក្សាព្រះធម៌ព្រះវិន័យដែលបង្រៀនដោយលោកម្ចាស់គ្រូ សន ទស្សវិទូ សូមគោរពអញ្ជើញពុទ្ធបរិស័ទចូលរួមតាមតំណ Group Telegram | Join នេះ ។ ខ្ញុំក៏បានប្រមូលសំឡេងបង្រៀនទុកដើម្បីងាយស្រួលចូលទៅស្ដាប់ដែរ (សូមអញ្ជើញរកតាមតំណ Telegram នេះ) ។ បើពុទ្ធបរិស័ទ​មានប្រាថ្នាចង់សិក្សាព្រះវិន័យតាមរយៈវីដូអូបកស្រាយព្រះវិន័យខ្លី ៗ សូមអញ្ជើញចូលតាមតំណនេះ៖ Facebook ព្រះ វិន័យ, Tiktok ព្រះ វិន័យ, YouTube ទស្សនបណ្ឌិតោ សន ទស្សនវិទូ, YouTube Korm Eav_គាំ អ៊ីវ) ។

សូមអនុមោទនា!

ព្រហស្បតិ៍ ៤ កញ្ញា ២០២៥
ម៉ោង ៨:៣៦ នាទី យប់