សៀវភៅ គួរពិចារណាដើម្បីចេះខ្មែរ (លោក ហ៊ែល ស៊ុំផា)

មួយរយៈចុងក្រោយនេះ ខ្ញុំឃើញមានគេយកសៀវភៅចាស់ ៗ មកបោះពុម្ពឡើងវិញជាច្រើន ។ កាលពីពាក់កណ្ដាលខែមុននេះ (១៥ សីហា ឆ្នាំ២០២៥) ខ្ញុំបានផ្ញើសារទៅហាងលក់សៀ...

មួយរយៈចុងក្រោយនេះ ខ្ញុំឃើញមានគេយកសៀវភៅចាស់ ៗ មកបោះពុម្ពឡើងវិញជាច្រើន ។ កាលពីពាក់កណ្ដាលខែមុននេះ (១៥ សីហា ឆ្នាំ២០២៥) ខ្ញុំបានផ្ញើសារទៅហាងលក់សៀវភៅមួយនៅម្ដុំវិទ្យាល័យព្រះស៊ីសុវត្ថិ ដើម្បីរកទិញសៀវភៅមួយចំនួនដែលខ្ញុំបានប្រទះឃើញតាមរយៈការផ្សព្វផ្សាយលើបណ្ដាញសង្គម ។ ខ្ញុំបានសាកសួររកទិញសៀវភៅបីក្បាល គឺ សៀវភៅ «បទសម្ភាសន៍នាទីអក្សរសាស្ត្រ សម្ដេចព្រះសង្ឃរាជ ជួន ណាត» (ខ្ញុំធ្លាប់បានអានត្រួស ៗ ខ្លះ នៅបណ្ណាល័យសាកលវិទ្យាល័យបញ្ញាសាស្ត្រកម្ពុជាជាយូរឆ្នាំមកហើយ), សៀវភៅ «គួរពិចារណាដើម្បីចេះខ្មែរ» នេះ (ខ្ញុំធ្លាប់បានអានផ្នែកដកស្រង់ខ្លី ៗ ដែលបង្ហោះលើទំព័របណ្ដាញសង្គម Facebook ឈ្មោះ ប៊ី សោភ័ណ និង Sophanby Sophan), និងសៀវភៅ «បញ្ចតន្ត្រៈ» បកប្រែពីភាសាសំស្ក្រឹតដោយព្រះភិក្ខុ ប៉ាង ខាត់ (ខ្ញុំបានឃើញក្របតាមអ៊ីនធឺណិត) ។ គួរឲ្យស្ដាយដែលក្នុងបណ្ដាសៀវភៅទាំងបីក្បាលនេះ មានតែសៀវភៅមួយក្បាលទេដែលមានលក់ គឺ សៀវភៅ «គួរពិចារណាដើម្បីចេះខ្មែរ» នេះឯង ។ ខ្ញុំបានទៅទិញសៀវភៅនេះនាថ្ងៃដដែល ក្រោយពេលចេញពីកន្លែងធ្វើការងារ ។ តាមផ្លូវត្រលប់មកផ្ទះវិញ ភ្លៀងបង្អុរមកស្ទើរតែជិះមកផ្ទះមិនទាន់ ។ ពេលមកដល់ផ្ទះភ្លាម ខ្ញុំយកសៀវភៅនេះមកអានភ្លាមតែម្ដង ។ ខ្ញុំមិនអាចអានសៀវភៅនេះចប់ទេនាពេលល្ងាចនោះ ហើយខ្ញុំក៏បន្តអានសៀវភៅនេះទៀតនាពេលល្ងាចបន្ទាប់, ថ្ងៃទី ១៦ និងថ្ងៃទី ១៧ ។ ខ្ញុំចំណាយពេលជិតបីម៉ោងកន្លះ ទើបអានសៀវភៅនេះចប់ ។

តាមរយៈក្របសៀវភៅខាងក្នុង (គួរពិចារណាដើម្បីចេះខ្មែរ លេខ ១) និងកថាមុខរបស់លោក ហ៊ែល ស៊ុំផា, សៀវភៅនេះមិនមែនមានតែមួយក្បាលឬមួយភាគបែបនេះទេ; លោកបានសរសេររៀបរាប់ថា សៀវភៅនេះនឹងមានភាគ ២, ភាគ ៣ ហូរហែរតទៅទៀត ។ តែខ្ញុំក៏មិនបានដឹងច្បាស់ថាហេតុអ្វីបានជាសៀវភៅនេះឃើញមានតែមួយភាគយ៉ាងនេះ ។ ប្រហែលមកពីបញ្ហាស្រុកទេសយើងក៏មិនដឹង បានជាមានការអាក់ខានមិនបានបោះពុម្ពផ្សាយជាបន្តទៀតយ៉ាងដូច្នេះ ។

សៀវភៅនេះគឺជាកម្រងអត្ថបទអំពីការប្រើពាក្យខ្មែរឲ្យបានត្រឹមត្រូវ ដែលលោក ហ៊ែល ស៊ុំផា បានប្រមូល ដកស្រង់ និងធ្វើសេចក្ដីអធិប្បាយ ដោយមានសម្ដេចព្រះមហាសុមេធាធិបតី ជួន ណាត ជោតញ្ញាណោ ព្រះសង្ឃរាជថ្នាក់ទី ១ នៃគណៈមហានិកាយ ទ្រង់ជួយពិនិត្យកែសម្រួល ព្រមទាំងថែមសេចក្ដីខ្លះដោយអន្លើផង ។ សៀវភៅនេះពិតជាមានសារៈសំខាន់ខ្លាំងណាស់សម្រាប់ខ្មែរយើងសិក្សារៀនសូត្រ ដើម្បីប្រើពាក្យខ្មែរឲ្យបានត្រឹមត្រូវ ។ ខ្ញុំបានរៀនសូត្រនិងយល់ដឹងច្រើនអំពីសៀវភៅនេះ ។

នាពេលកន្លងមក ខ្ញុំបានដកស្រង់យកអត្ថបទធម្មទានអក្សរសាស្ត្រខ្មែរពីគណនី Facebook លោក ទុត បូ មកចុះផ្សាយដោយដាក់ក្នុងស្លាកអត្ថបទ «រៀនពាក្យខ្មែរ» បានជាច្រើនអត្ថបទ ។ ខ្ញុំក៏បានស្រង់ពាក្យថ្មីខ្លះ ៗ យកមកចុះផ្សាយ នៅក្នុងស្លាកអត្ថបទ «រៀនពាក្យថ្មី» ។ ជាបន្តទៅទៀត ខ្ញុំនឹងដកស្រង់អត្ថបទខ្លះពីក្នុងសៀវភៅនេះយកមកចុះផ្សាយជូនប្រិយមិត្តអ្នកអានទៀត ដោយដាក់ក្នុងស្លាកអត្ថបទ «ចេះខ្មែរ» ។

រូបភាព SK Book shop

ជាចុងក្រោយ ខ្ញុំមានសៀវភៅខ្លះដែលខ្ញុំធ្លាប់បានអានរួចមកហើយ ដើម្បីណែនាំជូនប្រិយមិត្តអ្នកអាន ។ សៀវភៅទាំងនោះរួមមាន សៀវភៅ «ដំណកឃ្លាក្នុងភាសាខ្មែរ», សៀវភៅ «យុគលពិន្ទុឬសញ្ញាចុចពីរ», និងសៀវភៅ «សំណេរនិងអក្ខរាវិរុទ្ធខ្មែរ» របស់លោក ច័ន្ធ សំណព្វ; សៀវភៅ «“ន” ជំនួស “ណ” “ល” ជំនួស “ឡ” ហេតុអ្វីក្រសួងអប់រំ យុវជន និងកីឡា សរសេរបែបនេះ?» និងសៀវភៅ «អ្នករៀបចំកែសម្រួលអក្សរខ្មែរមុនគេ» របស់លោក លី សុវីរ; សៀវភៅ «ស្វែងយល់ ចង់ក្លាយជាអ្នកនិពន្ធ» របស់លោក ច័ន្ទ ឫទ្ធី; និងសៀវភៅ «វេយ្យាករណ៍ ជួន ណាត» របស់លោក ធន់ ហ៊ិន ។ មានសៀវភៅខ្លះទៀតដែលខ្ញុំបានឃើញក្នុងបណ្ដាញសង្គម តែនៅមិនទាន់បានអាន ។ សៀវភៅទាំងនោះរួមមាន សៀវភៅ «អក្សរសំលាប់ ខ្មែរមានព្យញ្ជនៈ ៣៣ តួ ហេតុអ្វីក៏បង្កើតអក្សរសំលាប់ ១២ តួទៀត?», សៀវភៅ «វិភាគសំនេរ និងអំនាន តាមក្បួនវចនានុក្រមខ្មែរ», និងសៀវភៅផ្សេងទៀតដែលអ្នកចេះដឹងភាសាខ្មែរនាសម័យក្រោយបាននិពន្ធនិងរៀបរៀងឡើង ។

ព្រហស្បតិ៍ ៤ កញ្ញា ២០២៥
ម៉ោង ៤:២២ នាទី រសៀល