ហេតុ​អ្វី​មិន​គួរ​ឲ្យ​អ្នកដទៃ​បង្កើត ឬ​ដឹង​ពី​លេខសម្ងាត់​គណនី អនឡាញ របស់​អ្នក?

កន្លង​មក​ក្រុមការងារ​បច្ចេកទេស​នៃ​នាយកដ្ឋាន​ព័ត៌មានវិទ្យា សង្កេត​ឃើញ​មាន​ករណី​ជាច្រើន ពាក់ព័ន្ធ​នឹង​ការ​លួច​យក​គណនី អនឡាញ (Apple ID, Faceb...

កន្លង​មក​ក្រុមការងារ​បច្ចេកទេស​នៃ​នាយកដ្ឋាន​ព័ត៌មានវិទ្យា សង្កេត​ឃើញ​មាន​ករណី​ជាច្រើន ពាក់ព័ន្ធ​នឹង​ការ​លួច​យក​គណនី អនឡាញ (Apple ID, Facebook) ដោយ​ជន​ខិលខូច​មួយ​ចំនួន ប្រើប្រាស់​រូបភាព​បើក​អាជីវកម្ម​បង្កើត​គណនី Apple ID និង​គណនី Facebook។ បន្ទាប់​ពី​បង្កើត​គណនី ជន​ខិលខូច​មួយ​ចំនួន​ខាង​លើ​បាន​ធ្វើ​ការ​កត់ត្រា​ព័ត៌មាន​គណនី​រួមមាន៖ អាសយដ្ឋាន​អ៊ីមែល លេខសម្ងាត់ និង​ធ្វើ​ការ​លួច​ចូល​ប្រើប្រាស់​នៅ​ពេល​ក្រោយ​ក្នុង​បំណង​ទុច្ចរិត។ តើ​មាន​ហានិភ័យ​អ្វី​ខ្លះ នៅ​ពេល​ដែល​អ្នក​ពឹង​ពាក់​អ្នកដទៃ​ឱ្យ​បង្កើត​គណនី Apple ID ឬ គណនី Facebook របស់​អ្នក?

១) ហានិភ័យ​នៅ​ពេល​ដែល​អ្នកដទៃ​ដឹង​លេខ​សម្ងាត់​គណនី Apple ID របស់​អ្នក៖
- ជន​អនាមិក​អាច​ធ្វើ​ការ​ផ្លាស់ប្ដូរ​លេខ​សម្ងាត់​គណនី​រងគ្រោះ​បាន​គ្រប់​ពេល តាមរយៈ Reset Password។ - ជន​អនាមិក​ទាំងនោះ​អាច​ធ្វើ​ការ​ទាញ​យក​កម្មវិធី​ផ្សេងៗ នៅ​លើ AppStore ប្រើប្រាស់​គណនី​ហិរញ្ញវត្ថុ​របស់​អ្នក។
- តាមរយៈ​គណនី និង​លេខសម្ងាត់ ពួក​គេ​អាច​ធ្វើ​ការ​ប្រើប្រាស់​កម្មវិធី iMessage ក្នុង​នាម​ជា​អ្នក។ - ពួក​គេ​ក៏​អាច​ធ្វើ​ការ​លួច​ចូល​មើល​ព័ត៌មាន​មួយ​ចំនួន​របស់​អ្នក​ដែល​បាន Backup អនឡាញ (ឧទាហរណ៍៖ កម្មវិធី Note, កម្មវិធី Reminders)
- តាមរយៈ​គណនី និង​លេខសម្ងាត់ ពួក​គេ​អាច​ធ្វើ​ការ​លួច​ចូល​ទៅ​កាន់ iCloud របស់​អ្នក ដើម្បី​លួច​ទាញ​យក​រូបភាព ឯកសារ ព័ត៌មាន​ផ្សេងៗ របស់​អ្នក ជាពិសេស​អាច​ដឹង​ពី​ទីតាំង (Location) និង​តាម​ដាន​ដំណើរ​របស់​អ្នក​បាន​គ្រប់​ពេល​វេលា (Live location)។

២) ហានិភ័យ​នៅ​ពេល​ដែល​អ្នកដទៃ​ដឹង​លេខ​សម្ងាត់​គណនី Facebook របស់​អ្នក៖
- ជន​អនាមិក​អាច​ធ្វើ​ការ​ផ្លាស់ប្ដូរ​លេខ​សម្ងាត់​គណនី​រងគ្រោះ​បាន​គ្រប់​ពេល តាមរយៈ Reset Password។ - តាមរយៈ​គណនី និង​លេខសម្ងាត់ ជន​ខិលខូច​អាច​ធ្វើ​ការ​លួច​ចូល​ប្រើប្រាស់​គណនី​របស់​អ្នក ប្រើប្រាស់​ដើម្បី​ឆបោក​ប្រាក់​សាច់ញាតិ មិត្តភ័ក្ដិ។ល។
- ប្រើប្រាស់​គណនី​ជនរងគ្រោះ បង្ហោះ​អត្ថបទ​អាសអាភាស នយោបាយ បរិហារកេរ្តិ៍ ឬ​អត្ថបទ​ល្មើស​ច្បាប់​ផ្សេងៗ។
- លួច​ចូល​មើល​រូបភាព ឬ​សារ​របស់​គណនី​រងគ្រោះ និង​ធ្វើ​ការ​គម្រាម​ទារ​ប្រាក់​ជា​ថ្នូរ​នឹង​ការ​រក្សា​ការ​សម្ងាត់​ផ្សេងៗ របស់​ជនរងគ្រោះ។


ដើម្បី​ការពារ​បញ្ហា​ដូច​បាន​រៀបរាប់​ខាងលើ នាយកដ្ឋាន​ព័ត៌មានវិទ្យា នៃ​ក្រសួង​មហាផ្ទៃ សូម​ធ្វើ​ការ​ណែនាំ​នូវ​វិធីសាស្ត្រ​មួយ​ចំនួន​ដូច​ខាង​ក្រោម៖
- ពុំ​ត្រូវ​ឱ្យ​អ្នកដទៃ​បង្កើត ឬ​ដឹង​អំពី​លេខ​សម្ងាត់​គណនី អនឡាញ របស់​អ្នក។
- ត្រូវ​ធ្វើ​ការ​ផ្លាស់ប្ដូរ​លេខសម្ងាត់ នៅ​ពេល​ដែល​សង្ស័យ​ថា​មាន​ការ​លួច​ប្រើប្រាស់​ខុស​ច្បាប់។
- ពុំ​ត្រូវ​ប្រើប្រាស់​គណនី​របស់​អ្នកដទៃ (ឧទាហរណ៍៖ គណនី Apple ID, គណនី Facebook)។
- ត្រូវ​ធ្វើ​ការ​បិទ ឬ​លុប​គណនី អនឡាញ នៅ​ពេល​ឈប់​ប្រើប្រាស់។
- ធ្វើ​ការ​លុប (Erase / Wipe / Facetory Reset) ឯកសារ រូបភាព និង​ព័ត៌មាន​ផ្សេងៗ ក្នុង​ឧបករណ៍​អេឡិចត្រូនិក​របស់​អ្នក (ទូរស័ព្ទ កុំព្យូទ័រ ឬ​ឧបករណ៍​ឆ្លាតវៃ។ល។) មុន​នឹង​លក់ ឬ​ប្រគល់​ទៅ​ឱ្យ​អ្នកដទៃ។

អត្ថបទ​និង​រូបភាព៖ នាយកដ្ឋានព័ត៌មានវិទ្យា ក្រសួងមហាផ្ទៃ
សម្រួល​អក្ខរាវិរុទ្ធដោយ ហេង-រង្សី